بنگلورو(ایجنسی) کرناٹک کو آج نیا وزیر اعلیٰ اور نائب وزیر اعلیٰ مل گیا ہے۔ سدارمیا نے وزیر اعلیٰ کے عہدے کا حلف لیا، جب کہ ڈی کے شیوکمار نے نائب وزیر اعلیٰ کے عہدے کا حلف لیا۔ انہیں گورنر تھاورچند گہلوت نے حلف دلایا۔ آپ کو بتا دیں، گورنر تھاورچند گہلوت نے سدارمیا، ڈی کے شیوکمار سمیت 8 ارکان اسمبلی کو حلف دلایا۔ خیال رہے کہ سدارمیا کی بطور وزیر اعلیٰ یہ دوسری میعاد ہے۔ وہ اس سے قبل 2013 اور 2018 کے درمیان اس عہدے پر فائز رہ چکے ہیں۔سی ایم اور ڈپٹی سی ایم کے علاوہ جن ایم ایل اے نے آج وزیر کے طور پر حلف لیا ان میں جی پرمیشور، کے ایچ مُنی یپا، کے جے جارج، ایم بی پاٹل، ستیش جارکی ہولی، پریانک کھڑگے، رامالنگا ریڈی اور بی زیڈ ضمیر احمد خان کے نام شامل ہیں۔تقریب حلف برداری میں اے آئی سی سی کے صدر ملکارجن کھڑگے، کانگریس لیڈر راہل گاندھی، اے آئی سی سی جنرل سکریٹری پرینکا گاندھی، راجستھان کے وزیر اعلی اشوک گہلوت، بہار کے وزیر اعلی نتیش کمار، تمل ناڈو کے وزیر اعلی ایم کے اسٹالن، جموں و کشمیر کے سابق وزرائے اعلیٰ فاروق عبداللہ اور محبوبہ مفتی، بہار کے نائب وزیر اعلیٰ تیجسوی یادو، سی پی ایم جنرل سکریٹری سیتارام یچوری، سی پی آئی جنرل سکریٹری ڈی راجہ اور این سی پی کے بزرگ رہنما شرد پوار نے شرکت کی۔اس کے علاوہ تمل سپر اسٹار کمل ہاسن، کنڑ سپر اسٹار شیوراج کمار، مقبول اداکار دنیا وجے، اداکارہ سے سیاست دان بنی رامیا، اداکارہ نشویکا نائیڈو، اداکارہ سے سیاست دان بنی اوماشری اور فلم ڈائریکٹر-پروڈیوسر وی راجندر سنگھ بابو نے بھی تقریب میں شرکت کی۔ خیال رہے کہ 10 مئی کو ہوئے اسمبلی انتخابات میں کانگریس نے 224 میں سے 135 سیٹوں پر کامیابی حاصل کی تھی، جب کہ بی جے پی 66 اور جے ڈی ایس 19 سیٹوں پر سمٹ گئی۔
کابینہ کی اگلی میٹنگ کے بعد پانچ گارنٹی اسکیم نافذ کی جائیں گی: سدارامیا
بنگلورو، 20 مئی (یو این آئی) کرناٹک کے وزیر اعلیٰ سدارامیا نے ہفتہ کو کہا کہ کانگریس نے اپنے انتخابی منشور میں جن پانچ گارنٹی اسکیموں کا ذکر کیا ہے انہیں کابینہ کی اگلی میٹنگ کے بعد لاگو کیا جائے گا۔مسٹر سدارامیا نے یہاں نامہ نگاروں کو بتایا کہ کابینہ نے تمام پانچ گارنٹی اسکیموں کو منظوری دے دی ہے اور اسے اگلی کابینہ کے بعد لاگو کیا جائے گا اور اس کی تفصیلات بھی اسی وقت شیئر کی جائیں گی۔ انہوں نے یقین ظاہر کیا کہ ان کی حکومت ریاست کو قرض میں دھکیلے بغیر منشور میں کئے گئے وعدوں کو پورا کرے گی، حالانکہ ان اسکیموں پر مجموعی طور پر سالانہ 50,000 کروڑ روپے تک لاگت آسکتی ہے۔کانگریس نے گرہ جیوتی، گرہ لکشمی، انا بھاگیہ، یووا ندھی اور ساکشی جیسی ضمانتوں کا اعلان کیا ہے۔ گرہ جیوتی یوجنا ریاست کے ہر گھر کے لیے ماہانہ 200 یونٹ مفت بجلی کو یقینی بنائے گی، جب کہ گرہ لکشمی یوجنا کے تحت گھر کی ایک خاتون سربراہ کو ماہانہ 2000 روپے فراہم کیے جائیں گے۔ انا بھاگیہ یوجنا میں غربت کی لکیر سے نیچے (بی پی ایل) کارڈ ہولڈروں کو ماہانہ 10 کلو مفت چاول دیا جائے گا اور یووا ندھی گریجویشن اسکیم کے تحت بے روزگار نوجوانوں کو 3,000 روپے اور اس سال کے بے روزگار ڈپلومہ ہولڈروں کو زیادہ سے زیادہ دو سال کی مدت تک کے لئے ماہانہ 1,500 روپے دیئے جائیں گے۔ ساکشی اسکیم کے تحت کرناٹک کی خواتین کو ریاست بھر میں سفر کرنے کے لیے مفت بس پاس فراہم کیے جائیں گے۔
